Maður með skoðun

Til hvers halda menn annars að maður sé með varaborgarstjóra. Til skrauts? Ef ekki væri fyrir svona fólk sem tekur vinnuna sína alvarlega væri þessi heimur m.a. fullur af forljótum skúlptúrum í fáránlegum litum. Þessi maður á mína virðingu og íslenskir stjórnmálamenn og embættismenn mættu læra af þessu.

Ekki réttur litur

Hræsnari

Þetta hlýtur að vera hámark hræsninnar. Ég á ekki orð yfir þessum ummælum.

„Sorg okkar er sönn og mun raunverulegri en uppgerðarsorg hryðjuverkasamtakanna sem stofna fólki sína í slíka hættu,”

Sannleikurinn er sá að ísraelski herinn skaut flugskeyti á hús þessarar fjölskyldu sem lét lífið en enginn "vígamaður". Þau sátu og snæddu morgunmat í ró og næði, fjögur börn og móðir þeirra. Ennfremur segir þessi maður að hermenn hans hafi verið "að reyna" að vernda ísraelska borgara. Til þess að vernda ísraelska borgara þarf greinilega að drepa konur og börn í palestínu. Það fylgir sögunni að enginn ísraeli var í hættu staddur fyrir utan einn hermann sem meiddist lítilega.

Hér fylgir ljóð sem bloggvinur minn Svartagall fann fyrir okkur;

Slysaskot í Palestínu (Í víngarðinum) eftir Kristján frá Djúpalæk

Lítil stúlka. Lítil stúlka.
Lítil svarteyg dökkhærð stúlka
liggur skotin.
Dimmrautt blóð í hrokknu hári.
Höfuðkúpan brotin.

Ég er Breti, dagsins djarfi
dáti, suður í Palestínu,
en er kvöldar klökkur, einn,
kútur lítill, mömmusveinn.

Mín synd er stór. Ó, systir mín.
Svarið get ég, feilskot var það.
Eins og hnífur hjartað skar það,
hjarta mitt, ó, systir mín,
fyrirgefðu, fyrirgefðu,
anginn litli, anginn minn.

Ég ætlaði að skjóta hann pabba þinn.

Þetta ljóð sýnir okkur að þetta er ekkert nýtt í Palestínu, nema hvað hér má skipta út Breta með ísraela.

Olmert vísar allri ábyrgð á Hamas

Endlosung

Þetta var nokkuð hnitmiðuð árás. Þetta hafa væntanlega verið "herskáir paelstínumenn", sérstaklega þessi sem var 15 mánaða. Hann var víst vopnaður rauðri plastskóflu og minnstu munaði að hann hefði fullorðnast og farið að leita hefnda. Verst að það særðust sex manns við drápin á þessum börnum. Við tökum þá bara næst.

Fjögur börn létust í árás Ísraelshers

Hóprefsingar

Hóprefsingar ísraelsmanna eru kolólöglegar samkvæmt Genfarsáttmála og öðrum mannréttindasáttmálum og ekki síst stríða aðgerðir þeirra gegn almennri siðgæðisvitund heimsins. Það er alveg sama þótt andstæðingar þeirra búi til heimatilbúnar sprengjur; ekkert getur réttlætt það að halda heilli þjóð í gíslingu og reyna að hrella líftóruna úr henni.

Önnur hóprefsing er útganga nokkurra þjóða af þessum fundi öryggisráðsins, á forsendum þess að fulltrúi Líbíu hafi sagt eitthvað sem þeir eru ósammála. Þar með var ekki hægt að ræða þetta mál, og ber að líta á það sem framlengingu á hóprefsingum ísraela á palestínumönnum. Þetta er alger skömm og hreinasta svívirða.

Hætta hjálparstarfi á Gaza

Refurinn og ungar hans

Þetta hefur verið ansi vel gert greni því það þurfti að fórna þremur mjög verðmætum ísraelskum lífum þegar refurinn var svældur út. Þetta þurfa sennilega palestínskar refafjölskyldur að svíða fyrir en bót í máli er þó að það tókst að fella 20 aðra palestínumenn í leiðinni og þar af fimm börn, upprennandi refir, þannig að vel bar í veiði. Þetta greni er tæmt. Það má því ætla að deilur palestínumanna og ísraela séu því sem næst leystar.

Ísraelsher í aðgerðum í Nablus

Landbúnað, ekki álver

Ef matvælaframleiðendum þessa lands væri boðin raforka á sömu kjörum og álframleiðendum held ég að væri hætt við því að íslenskur landbúnaður myndi taka mikinn kipp, störf skapast, verðmætasköpun aukast og íslendingar betur í stakk búnir gegn væntanlegum matvöruskorti og yfirhöfuð betur í stakk búnir gegn hvaða vá sem þessi heimur otar að okkur. Hvað eru menn annars að hugsa með þessa ál-þráhyggju sína? Vaknið íslendingar!!!

Reikna með Helguvíkurálveri

Ástæðan

ég skil ekki af hverju mbl getur ekki nefnt ástæðuna fyrir þessum uppsögnum. Það er skilmerkilega gert grein fyrir þessu í Dagens Næringsliv; ástæðan er að Kaupþing hefur tekið af starfsfólki bónuspott og eitthvað var víst ekki í lagi með hvernig var gengið að því máli. Þessvegna hafa háttsettir starfsmenn í Kaupþingi í Noregi sagt upp.

Eru blaðamenn morgunblaðsins svona latir eða er þetta bara vegna þess að þeir hafa ekki tíma til þess að sinna fréttaflutningi almennilega?

Fleiri segja upp hjá Kaupþingi í Noregi

Eitt er lausahestar

annað og verra mál er það þegar þessir hestar eru farnir að keyra bíla með miklum ofsa um sveitir landsins. Sem betur fer er lögreglan dugleg að taka þessar ótemjur þegar þeir eru að keyra á ofsahraða en Guð má vita hvenær þetta endar með ósköpum. Mér er líka spurn hvar þessi hross ná sér í bíla og hvort þau hafi haft áfengi um hóf við aksturinn. Er þetta skipuleg glæpastarfsemi og getur verið að það sé komin á laggirnar hestamafía hér á landi? Eins og hestum hefur fjölgað á Íslandi skyldi það ekki koma neinum á óvart.

Lausir hestar skapa mikla hættu

Matarskortskreppan

Það hefur mikið borið á fregnum undanfarið tengdum síhækkandi matverði á heimsmarkaði og tiltakandi matvælaskorti í mismunandi heimshlutum. Í pakistan hefur herinn verið settur til þess að standa vörð um hrísgrjónalagera og í Taílandi hefur borið á því að hrísgrjónaakrar sé hreinsaðir að nóttu til af ræningjum. Þar er nú bannað að aka landbúnaðarvélum um vegi að nóttu til þess að stemma stigu við þessu. Verð á hrísgrjónum hefur tvöfaldast á undanförnum þremur mánuðum óg ekkert útlit fyrir að þessi þróun stöðvist. Indland hefur lokað að mestu fyrir útflutning á hrísgrjónum og ekkert er sennilegra en að sá útflutningur sé úr sögunni. Þessi geysilega verðaukning á hrísgrjónum er eflaust óþægileg fyrir flesta neytendur í heiminum, en ekki sambærileg fyrir þann hluta heimsins sem vart hefur í sig og á. Þetta fólk er nú í verulegum vandræðum með að komast yfir nóg af matvörum til þess að lifa af og staða þess mun versna á næstu mánuðum. Ef ekki verður brugðist við þessu straks og með fullri alvöru munu vafalaust ófáar milljónir manns deyja hungurdauða. Fljótlega.

Í suður ameríku hefur verð á korni og maís tvöfaldast og frá Haiti berast fréttir af óeirðum og fjöldamótmælum. Samkeppni eldsneytisframleiðenda (framleiðsla á lífrænu eldsneyti) við matvælaframleiðendur hefur rýrt hlut korn og maísframleiðslu sem fer til manneldis og þvingað heimsmarkaðsverð á þessum afurðum upp í áður óþekktar stærðir. Matarbúr heimsins, hvort sem það er korn, maís eða hrísgrjón hefur snarminnkað að undanförnu.

 

Þetta er raunveruleg kreppa og við erum sennilega bara að sjá fyrstu drög hennar.  Erfitt er að sjá fyrir hversu alvarlegt þetta mun verða en eftir því sem ég hef lesið eru ekki góðir tímar framundan og persónulega er ég að hugsa um að kaupa stóran sekk af hrísgrjónum á leiðinni heim úr vinnunni í dag.  Spurning hvort það dugi nokkuð.

Hér er athyglisverð grein um þessi mál á bloggsíðu Marínó G. Njálssonar.

 

Einnig er hér grein í mbl um þessi mál.

 

 

 

 

Bíddu við...

ekki lengur skuldugasta þjóð í heimi? Breyttist eitthvað annað en reikniaðferðin? Eru þetta merki um betrun á efnahag þjóðarinnar eða sniðugheit bankamannsins að reikna?
Ég ætti að láta þennann mann fara yfir fjárhaginn minn, kannski er ég moldríkur ef reiknað er rétt.

Ekki lengur skuldugasta þjóð í heimi